• News

  • News

  • የእንግሊዝ ኩባንያ በአፋር ክልል 4.2 ቢሊዮን ቶን የፖታሽ ማዕድን ክምችት ማግኘቱን አስታወቀ Posted on 11 May 2015

    በአፋር ብሔራዊ ክልላዊ መንግሥት ዳሎል አካባቢ 4.2 ቢሊዮን ቶን የሚገመት የፖታሽ ማዕድን ክምችት ማግኘቱን፣ ሲርከም ሚኒራልስ የተሰኘ የእንግሊዝ ኩባንያ አስታወቀ፡፡ 

    ሲርከም ሚኒራልስ ሚያዝያ 29 ቀን 2007 ዓ.ም. ባወጣው መግለጫ፣ ይህ ከፍተኛ መጠን ያለው የፖታሽ ማዕድን ክምችት በአነስተኛ ወጪ ሊለማ የሚችል መሆኑን ጠቅሶ፣ ከጂቡቲ ታጁራ ወደብ በቅርብ ርቀት ላይ የሚገኝ በመሆኑ ፕሮጀክቱን አዋጭ እንደሚያደርገው አስታውቋል፡፡ ኩባንያው በዓመት 2.75 ሚሊዮን ቶን ፖታሽ ማምረት የሚያስችለው የማዕድን ማውጫ ለመገንባት ማቀዱን ገልጾ የአዋጪነት ጥናት በማካሄድ ላይ መሆኑን ጠቁሟል፡፡ 

    ሲርከም ሚኒራልስ በዳሎል አካባቢ 365 ካሬ ኪሎ ሜትር ስፋት ያለው የፖታሽ ማዕድን ፍለጋ ይዞታ ያለው ሲሆን፣ እ.ኤ.አ. ከ2013 ጀምሮ የምርመራ ሥራ ሲያካሂድ ቆይቷል፡፡ 

    ሲርከም ሚኒራልስ ባወጣው መግለጫ ላይ ሪፖርተር ያነጋገራቸው የማዕድን ሚኒስትሩ አቶ ቶሎሳ ሻጊ፣ ኩባንያው የምርመራ ሥራ ሲያከናውን መቆየቱን አረጋግጠዋል፡፡ ‹‹ኩባንያው በትክክል ጥናት እያካሄደ ነው፡፡ የኩባንያውን ሥራ መሥሪያ ቤታችን እየተከታተለ ነው፡፡ እነርሱም ሪፖርት እያደጉ ናቸው፡፡ ጥሩ ውጤት ማግኘታቸውን እናውቃለን፤›› ያሉት አቶ ቶሎሳ፣ ሲርከም ሚኒራልስ በአሁኑ ወቅት የአዋጭነት ጥናት በማካሄድ ላይ መሆኑን ተናግረዋል፡፡ 

    ሲርከም ሚኒራልስ አገኘሁት ያለውን 4.2 ቢሊዮን ቶን የፖታሽ ክምችት መጠን አስመልክቶ ኩባንያው በመሥራት ላይ ያለውን የአዋጭነት ጥናት አጠናቆ ለማዕድን ሚኒስቴር ሳይቀርብ፣ ሚኒስቴሩ የክምችቱን መጠን ማረጋገጥ እንደማይችል ተናግረዋል፡፡ ‹‹ፕሮጀክቱ አሁን ባለበት ደረጃ የፖታሽ ማዕድኑ ክምችት መጠን ይህን ያህል ነው ብለን መናገር አንችልም፡፡ ይሁን እንጂ የአዋጭነት ጥናቱን ከአንድ ዓመት ባነሰ ጊዜ ውስጥ አጠናቆ ያቀርባል ብለን እንጠብቃለን፡፡ ስለክምችቱ መጠን ያን ጊዜ መነጋገር እንችላለን፤›› ብለዋል ሚኒስትሩ፡፡ 

    በአፋር ክልል ሰፊና በፖታሽ ማዕድን የተሸፈነ መሬት እንዳለ ይታወቃል፡፡ በአሁኑ ወቅት የካናዳው አላና ፖታሽ፣ የኖርዌይ ያራ እና ሲርከም ሚኒራልስ በፖታሽ ፍለጋ ሥራ የተሰማሩ ኩባንያዎች ናቸው፡፡ የፖታሽ ማዕድን የተለያዩ የማዳበሪያ ዓይነቶች ለማምረት የሚጠቅም የኢንዱስትሪ ማዕድን ነው፡፡ 

    አላና ፖታሽ ለስድስት ዓመታት ባካሄደው የማዕድን ፍለጋ 3.2 ቢሊዮን ቶን የሚገመት የፖታሽ ማዕድን ማግኘቱን አስታውቋል፡፡ በ750 ሚሊዮን ዶላር የፖታሽ ማዕድን ማውጫና ማቀነባበሪያ ፋብሪካ ለመገንባት አቅዶ ከማዕድን ሚኒስቴር የከፍተኛ ማዕድን ምርት ፈቃድ ወስዶ ወደ ግንባታ ለመግባት በዝግጅት ላይ በነበረበት ወቅት፣ የዓለም የፖታሽ ዋጋ በማሽቆልቆሉ ምክንያት ፕሮጀክቱን በዕቅዱ መሠረት ማስኬድ አልቻለም፡፡ አላና ይዞታውን እስራኤል ኬሚካልስ ለተሰኘ ኩባንያ ለመሸጥ መስማማቱን መዘገባችን ይታወሳል፡፡ 

    የፖታሽ ማዕድን ማዳበሪያ ለማምረት የሚጠቅም በመሆኑ፣ በአፋር ክልል የሚገኘው የፖታሽ ማዕድን ክምችት የኢትዮጵያ መንግሥት ለነደፈው ግብርና መር የኢንዱስትሪ ልማት ፖሊሲ ወሳኝ ሚና ይጫወታል ተብሎ ተስፋ የተጣለበት ሀብት መሆኑ በስፋት ይነገራል፡፡ 

    የኢትዮጵያ መንግሥት ለማዳበሪያ ግዢ በዓመት ከ150 ሚሊዮን ዶላር በላይ የሚያወጣ ስለሆነ፣ የአፋር ፖታሽ ማዕድን ጥቅም ላይ ቢውል ከፍተኛ የውጭ ምንዛሪ ማዳን እንደሚቻል የዘርፉ ባለሙያዎች ይናገራሉ፡፡ ባለሙያዎች ከአገር ውስጥ ገበያ አልፎ የፖታሽ ማዳበሪያ ወደ ተለያዩ አገሮች በመላክ ከፍተኛ የውጭ ምንዛሪ ማግኘት እንደሚቻልም ያሳስባሉ፡፡

    « Back to news archive